Luine dive pe data 4.to yuni 2022, Kosovaka Republikako Sherunoministri, Albin Kurti, mestingya kotar o angazhipe sar taloministro e Kulturako, Ternengo thay Sportesko, e r. Sejnur Veshall.

Deciziya postuisali kotar korkoro e rayo Veshall, ani piri oficialuni facebookeski qham thay vazdingya bare reakcie kotar o civilyuno amalipe.

Ano postipe o Sejnuri informinla kay o mestipe kotar e obligacia sar taloministro manglili kotar e korkori partia LPRK – koya vi propozingyaole.

“Me saday kergyum buti, niso may buderi. Faktorizisalum sakana yekh rom ano raipe, niso may but, thay avdive mestingyovava saday vash o personalune resya. Ano moro angazhipe saday mucisalum te proklaminav e komunitetyengo afiniteti, thay reslum.”

Sasavipea, ji akana o r. Veshall iklisto ano duy medie, sar KIKS – Klan Kosova thay Ditari – Teve, kote desar mothavinindoy pere suksesya dengya respondipya e jurnalistyenge vash o avutne planya thay e mestipasko sebepi.

Ani aver rig, sheruno e partiako LPRK, mashkari oficialuni facebookeski qham, deklaringya kay: e Deciziya vash leskoro mestipe kotar e pozicia sar taloministro ani MKRS, rezultinla kotar oleski neglizhenca vash khetane butikeripe e partiaka sherunipa thay lakere sherunea.

“Pe fakto, vash yekhuno sebepi, korkoro cidingyum vast kotar e taloministroski pozicia, ano vahti kana simay reprezenti kotar o aver politikuno subyekti. Thay, nashti toleringyum ani miri partia, ini soske kergyum buderi lafipya e r.Veshaleya, numay bibahtake sah rezultinde pherde neglizhipa kotar ov.

Sasavipea, palo leskoro informipe kay o avutno taloministro ka ovel jeno kova dengya kontributi vash e romana kulturake vash 20 bersha, irati pe data 6.to yuni 2022, lansirisalo kay o r. Suleyman Elshani – alosardilo sar taloministro e Kulturako, Ternengo thay Sporti.

Numay kotar o politikuno subyekti LPRK, pandar na dendile medialune prezentipya vash akala deciziya.