Romani Yekhipaski Partia ani Kosova – PREBK arat ano Restaurant Nafroni ano Prizren si te manifestinel o Mashkarselikano Dive e Romana Qhibyako – 5.to Novembri.
Akaya informacia ulavdili vi kotar o sheruno e akala partiako thay yekhe dromea deputeti ano Kosovako Parlamanti, rayo Albert Kinoli mashkari yekh realizimi intervista vash o Radio Romano Avazo.
“PREBK partia mashkaro phikoipe e sheruneministresko Albin Kurti thay aver digasterya, kerde shayutno kay pe data 4 novembri te manifestina e Romana Qhibyako Dive, ani may laqhi qhand sar siyem manifestinde o 8.to aprili o Romano Dive, mashkaro phikoipe e Komunitetyenge Ofisesko talo Sheruneministresko Kabineti.”, phenla o rayo Kinoli.
Ani akava manifestivuno evenimenti ajukergyola te lel kotor e Kosovaka Republikako sherunoministri, r. Albin Kurti, raipaske ministerya thay aver uqhe rashtrune pozicie, civiluno amalipe thay dizutne kotar e Kosovake komune.
Desar akalestar o rayo Kinoli puqlilo vi vash o biimplementipe e deciziako feriso pandar nashti te putergyol konkursi vash translatori vash e romani qhib ani Prizrenoski Komuna.
“Amen sinemen kontaktya vash yekh lektori thay translatori vash e Romana Qhibyake puqipaske, koya pakyava kay e 2027.to bersheske bujetea akaya rodlarin ka akseptingyol thay ka realizingyol feriso kergyem baro insistipe thay rodlarina.”, deklaringya o deputeti Kinolli.
Desar akalestar o deputeti Albert Kinoli mangela kay sa e romen thay e yaver komuniteten te ovelolen yekh suksesuno bersh, laqho, sastipa thay resipa kay sah o procesya kola aqhile te trumingyon may angle ano shukaripe vi vash e romane komuniteteske vi vash e Kosovaka Republikake.
