Yekh bersh palo aprovipe e Lokalune Akcionalune Planesko vash involvipe e romane, ashkalyune thay egiptasyune komunitetesko ani Prizrenoski Komuna, pandar na startingya te implementingyol ani konkretuni forma, jikay o bujeti 50 mile euro, dikhlardo vash o bersh 2026, pandar nane ulavdilo.
Hramipe e Planesko realizisalo kotar e BRO Nevo Koncepti ano khetanebutikeripe e KFOS-eya, palo neglishipya thay nanipe e gatiseripesko kotar e Prizrenoski Komuna vash te hraminen o dokumenti. Palo yekh procesi kova lugyardilo yekh ji duy bersha, o plani votuisalo ani unanimuni qhan ani Prizrenoski Kupatni, kova angleder dikhlardilo thay votuisalo kotar o Komiteti vash Politike thay Financie.
Akcionaluno Plani anglodikhlarela aktivitetya sar mase ano nesave umala, uqharipa o siklipe, socialuno shukaripe, akomodipe, butikeripe, sastipe, kultura thay media vi informacia.
Vash monitoripe thay koordinipe e implementipasko e akale planesko kreirisalo vi o Komunaluno Akciako Komiteti, sherunipa kotar o talosheruno e Prizrenoska Komunako vash o Haricune Komunitetya, Furkan Butuc, jikay o koordinatori si o Islam Elshani.
Mashkaro Elshani, ano lungipe e Planeske aprovipaske procesesko, e Komuna dengya lafi kay ano bujeti e bershesko 2026 ka agnlodikhlarel 50 mile euro e yekh specialune kodeya ano rami e Ofisesko vash o Komunitetya thay Iranipe. Sasavipea, akala pare pandar nane ulavdile vash o implementipe e anglodikhlarde aktivitetyengo.
Komunaluno Komiteti vash Akcia lele nesave bajakya vash koordinipe vash implementipe e planesko. Ano shrdipe e bershko realizinde kedipya e komunalune direktoriencar kola silen phandipe e obyektivencar sar si e Siklipeski, Kulturaki, Sastipeski thay Socialune Servisyengi Direktorie.
Sar phenla o Elshani, akala direktorie mothavde gatiseripe vash implementipe e aktivitetyengo thay sakoya alosargya po yekh personi vash kontakti thay khetanebutikeripe, kova ka ovel godorno vash komunikipe e Komitetea thay raportipe vash aktivitetyengo realizipe.
“Ano bersh 2026 ka ulavgyol bujeti ano yekh specialuno kodi vash o Ofisi vash o Komunitetya thay Iranipe. Ano bersh 2026 kergyam lafi thay dikhlum korkoro kay ano sistemi figurinena 50 mile euro vash akava plani. Ji akate siyem resle, numay si stagnipe, thay akaya akana si yekh nevi sfida vash amenge.” Phengya o Islam Elshani, koordinatori e Komunale Komitetesko vash Akcia.
Yekh kotor e Planeske Aktivitetyengo anglodikhlargyola te realizingyol kotar o civilune amalipaske organizacie mashkaro publikuno kharipe. Numay, vi akava procesi pandar na alo ani faza vash konkretuno implementipe.
Elshani phenla kay ini soske lelile ji akana o mangla bajakya, o procesi stagnirisalo thay prezentirinla sfida vash o Komunaluno Komiteti vash Akcia.
O Lokaluno Akcionaluno Plani sile res te laqharel e romane, ashklyune thay egiptasyune komunityengo involvipe ano socialuno thay institucionaluno jivdipe e komunako, mashkaro konkretune mase ano siklipe, butikeripe, sastipe thay socialuno shukaripe, kultura thay aver umala.
Sasavipea, yekh bersh palo lesko votuipe thay aprovipe, konkretuno implementipe e akale masengo pandar na startingya jikay o bujeti 50 mile eurengo anglodikhlardo vash o bersh 2026 pandar nane ulavdilo.
Akava artiklo realizisalo mashkari emisia e tema “Lokaluno Akcionaluno Plani vash Involvipe e komunitetyengo roma, ashkalie thay egiptasya ani Prizrenoski Komuna 2025-2028”, kova realizisalo ano rami e proyektesko “Promovipe e haricune komunitetyenge hakayengo thay aksesesko mashkaro institucionaluno khetanebutikeripe, sahastarde politikengo thay mangle phikoipasko” phikoimo kotar o OSBE thay implementimo kotar Radio Romano Avazo.
Linkya: