O fakti kay anglo 21 bersh o kosovake roma etiketisale sar kolaboratorya e nakhle rezhimeya angya buderi bilache situacie pedral o roma. Vash o palune 20 bersha o roma ani kosova pere janipeya reste te inaren yekh shukar imazhi ko amalipe kote jivdinena ovindoy kotor e sakodivune jivdipesko. Ini kay si pandar defektya vash o romengo pherdo kotorleipe ano malipe o roma siton ano shukarno drom kay te sigurinen yekh shukarno avipe decisindoy korkore.

Sah akava so lepargyum ko paluno vahti rizikingyola e formiripeya e but romane politikune subyektengo kote o roma ani Kosova akana si ulavde ano duy zone: odola odolenca thay akala akalenca.

Tendenca kay pedral o roma te instalingyol yaverengo mangipe ovela so may baro vash sebepi e romenge na yekhipesko. Akava seriozune ka rizikinel o romengo egzistipe ani Kosova thay bayripe e shaipesko vash o romengo asimilipe.

Riziko vash egzistipe ka ovel e romenge migripeya vash o sebepya e malipeska thay ekonomikuna presiako ji kay riziko vash asimilipe ka ovel leipeya pe dikhipe kay o roma e yaverenge ka mangen te mothavenpe kay siton kotor "akalengo" thay ka pasharen peste olenge, sakana so ulo palo maripe ko yekh kotor e romane komunitetesko, kay ule yaver.

Vash e akanutni situacia siam saren bange. Na pashargyam e duyto zona e kosovake romengi numay ni on na mangle te pashon amenge. Na interesisalam but vash amaro "Romanipe" thay dengyampe e yaverenca kola mamuyinde kay siton amaro kotor thay ayekha ushtinde.
Amari strategia akana musay te ovel kay amen te mamuyina e yaveren thay te vastina amare qaqune elementya vash te bayrova sar ROMA.

Amen sar civiluno malipe tentingyam kay o trin te oven ano yekh than, soske na ini o shtarto te pashol. Numay, niyekh na mangle!

Na sim mamuy nikaske. Numay sim mamuy kay o roma te manipulingyon e Barendar thay te instalingyol o romengo reprezentipe sar o yavera mangena.

AMEN O ROMA MUSAY TE DECISINA KORKORE KO KA REPREZENTINEL AMEN!

AMARI SITUACIA NIYEKH NA KA LAQHAREL TE SINE KAY AMEN NA

OVLAMEN YEKHIPE. AMARO PATRIOTIZMO SITO AMARO YEKHIPE!

Pakya kay na ka ovel odova so jana, ka ovel odova so manga!

Tumaro,
Avdi Misini