Pe 25.to septembari, pe ora 17:00, ano Kompleksi Europa ano Prizren, ka adikergyol o promovipe e pustikako “O Suno te na ovel qhaqhipe”, drama e autoreski thay dramaturgeski Nexhip Menekshe.
Drama tretirinla e terne prandipyengi tema thay o ziyani e akale prandipyengo ko terne qhaye. Mashkaro dramatikuno mothavipe, oy biqhalela yekh zoralo mesazhi vash e siklipasko, shukarnohalovipasko thay familiarune phikoipasko mahatnipe, vi ayekha e qhayengo hako vash te decizinen poro avutnipe.
E drama botuisali shrdipa pe romani qhib thay irandili ani albanyuni, anglikani, serbyuni thay turkyuni qhib.
Pe lungipe e promovipasko ka adikergyol yekh panel diskucia vash e pustik, tematika koya ka tretirinel o mahatnipe e dramako vash o teatro, literatura thay romani kultura.
Eventi si te adikergyol ano Kompleksi Europa, pali Xhamia e Sinan Pashaski, pe 25.to septembari pe ora 17:00.
Botuipe realizisalo kotar e Europaka Uniako financionaluno phikoipe, ano rami e individualune proyektesko kotar e Msc. Urma Menekshe, e titula “Alava kola garavna e Romane Qhayen: Literatura mamuy o Terne Prandipya”.
