Muhamet Elshani ulavgya poro naqalaripe phando e organizipaska forma kotar e funduni skola Mustafa Bakija vash e yekhto klasake paralele, kote phengyola kay si na beraberuno tretiripe, may buderi vash o komunitetya roma, ashkalie thay egipqayna.
Elshani phenela kay sakova siklovno manglape te treteringyol beraberuno thay te denole yekhune shayipya ano siklipe, avansipe thay inkludipe ano skolako jivdipe.
Yekhe dromeya o Elshani kerela naysipe vash o Komunaluno Siklipasko Direktoriati ani Gjakova vash o siguno reaguipe thay intervenipe ano adresipe e akale puqipyasko, kote yekhatar rumisale akala paralele kola formirisale bi respektipa ni o qhayengo thay qhavengo ulavipe numay ni e komunitetyengo thay e handikepyune qhavorengo ulavipe.
Elshani kerla kharipe kay pe avutnipe te ovel may baro dikhat kay akala praktike te na oven palem thay te biqhalen ano ulavipe e siklovnengo ano komunitarune baze.
“Siklipe si beraberuno, sahuqharipe thay na diskriminipe manglape te ovel yekhuno standardi vash sah o qhavore”, phengya o Elshani.
