Nejip Menekshe Biyasalo 15.12.1966 ano Prizren. Agoringya o fakulteti vash e Edukacia ano Prizren. Penjargyola sar: aktori, dramaturgi, zhurnalisto thay sikavno e romana qhibyako ano Prizren. Sine direktori e organizaciako “Durmish Aslano” e bershesta 2003 ji pe 2019. Dengya kontributi vash o Romano Teatro andar o vahti kana formirisalo ji kana yaveringya poro jivdipe.

Dengya baro kontributi ano sah 26 drame kola kheldile e romane teatrostar e bershestar 1989 ji 2019. Sine anglune Nejip Menekshe 17 aktoryendar kola ushkavde o teatralune phala ano eskperimentaluno kotor “O vilo putarela pere phaka”. Nejip Menekshe sine aktori ano drame: “O kamipe na puqela” (Tefiko), “O Spiuni” (sheruni rola, Flito), “O Kamberi thay e Leyla” (Garo), “Prizren via Essen” (Jemo), “Magia” (Faredini), “Tara morkyatar nashti te iklove” (Ramo), “Keqap Klasa” thay “Saren ani Skola” (direktore e organizaciake), “Me deputeto” (Rejepi) thay ani agorutni drama “Sine kay sine yekh Kuytim Pacaku” (Narratori). Ov sine o trinto dramengo hramarno ano Prizren thay jeno kova sile may but drame ano romano teatro ji akana. O drame kola hramindoy thay kerdoy lengi rejia si: “O Kamberi thay e Leyla”, rejiseri e dramako “Bi pakyavno muy”, “Prizren via Essen”, “Magia”, rejia “O kamipe na puqela” (nevi verzia), autori e dramako “Tara morkyatar nashti te iklove”, “Keqap Klasa”, “Saren ani Skola”, rejia e dramaki “Ano Drom”, “Bori kotar e Germania”, rejiseri e dramako “O jivdipasko phiripe”, “O suno tena ovel qhaqhipe”, “Me deputeto”, “O sundal si e romengo them”, profesionaluno konsultanti ani nevi verzia e dramaki “Ano drom”, “Vijaipe mamuy o steriotipya”, autori e dramako “Sine kay sine yekh Kuytim Pacaku”. O Nejip Menekshe sine aktori ano 13 drame e Romane Teatroske, autori e 12 dramengo thay rejiseri e 18 dramengo (nesave ano solduy verzie). Ov pere dramencar lela but poqinya ano festivalalya.

E bershesta 1989 ji pe data 14.09.2019, kana ov yaveringya piri lumia dengya baro kontributi vash o Romano Teatro ano ververutne pozicie. Vash akava sebepi o romano teatro meritinla te lol oleskoro anav sar Romano Teatro “Nejip Menekshe”.